Tag-Lagas

sinabi mo sa aking "habambuhay"
kasabay ng pagdidilig mo ng matatamis na halik
at ang pagsibol ng ating mga mabababaw na saloobin
dito mo pinakita sakin ang langit

sinabi mong "ikaw lamang"
sa bawat maiinit mong yakap
ang ating pagmamahala'y walang kapantay
halos... walang kapantay

di ko alam kung pano nawala
di ko napunang ika'y lumisan
naghihintay padin ako sa hardin
kung saan nalagas ang bubot ng pag-ibig

nagpasya akong maglakbay
hanapin ang nawala kong buhay
sa huli'y di ko inasahang,
sa kanlungan din, muli'y magkikita

sinabi mo noong "habambuhay"
sinabi mo noon, "ikaw lamang"
ang mga dahong nagsilbing saksi
sa ihip ng hangi'y kasabay na umalis

Isang Sandali sa Loob ng Pinagtagpi-tagping Bakal

ito ang mundo kung saan ang waluhan ay nagiging siyaman
dikitdikit na siko, halohalong pawis
pilit ang upo ng mga dalagita sa bandang dulo, sa likod ni manong
pumapasok ang usok na binubuga ng nanggigitatang tambutso
papasok sa lungga ng pinagtagpi-tagping bakal
papunta sa iyong ilong at sa malapit mo nang bumigay na baga

manong, bayad po, isang makaliko
ipapasa mo ang benteng tiniklop ng pahaba
dahan dahan, hanggang dumating sa kanlungan ng nanggigitata nyang kamay
susuklian ka ng dalawang bebenchingkong barya
tahimik mong babagtasin ang kalsadang walang lilikuan
habang pinapakinggan ang ingay ng makina ng pinagtagpi-tagping bakal

Change of Hearts

eto ang ginawa mo sa akin...



kinuha mo ang ngiti sa aking mga labi at pinaltan mo ng mga mapapait na halik. ang dating maligaya kong mga mata ay napuno ng pagpapanggap, sa mundo di ko ninais galawan.

ninakaw mo ang dating sa akin, paano mo masasabing maganda ang buhay, na noon ay makulimlim at maulan. dinala mo ako sa binabaha mong mundo at tumira ka sa masaya kong paraiso.


ginawa mo akong ikaw, at kinuha mo ang pagkatao ko. tinitignan mo akong parang isang tupang walang pastol. samantalang ako ang pastol na nag-aruga at nag-alaga sayo.


pano mo ako nagagawang pagtawanan? matapos mong itapon ang nakaraang binago nating dalawa. ikaw ay naging ako, ako, ay naging ikaw.

masaya ka, malunkot ako

di na ako ang dating ako

naliligaw ako sa kalsadang iisa lang naman ang patutunguhan, patuloy na binabagtas ang daang di ko alam ang patutunguhan.

mag-isa...

sumasabay...

sa agos...

ng walang hanggang...

pagkalunod...



eto ang ginawa mo sa akin...